ჯანსაღი ცხოვრების პორტალი
ველოსიპედით სიარული ისეთივე კარგი ვარჯიშია, როგორც – ძალიან სახალისო. დაჯექით ნებისმიერი სახის ველოსიპედზე და თქვენი გულისცემა გახშირდება, ასევე გაიზრდება სუნთქვის სიხშირე, გამოგივათ ოფლი და ა.შ. იქნება ეს ასფალტზე საგზაო ველოსიპედით სიარულით, ქვიშიან ბილიკზე მგზავრობა თუ პედლების დაჭერა დახურულ სტუდიაში – თქვენ ნებისმიერ შემთხვევაში თქვენს გონებას და სხეულს დიდ სარგებელს აძლევთ.
ერთ-ერთი ყველაზე დიდი სარგებელი კარდიოს უკავშირდება.
კარდიო ვარჯიში არის ნებისმიერი ვარჯიში, რომელიც აჩქარებს გულისცემას და სუნთქვას. ის შეიძლება იყოს აერობული ან ანაერობული, ვარჯიშის ინტენსივობის მიხედვით.
აერობულია ვარჯიში არის რიტმული აქტივობა, რომელიც იყენებს კუნთების დიდ ჯგუფებს. მას ასევე უწოდებენ სტაბილურ ვარჯიშს და შეიძლება მოიცავდეს სირბილს, სიარულს, ველოსიპედით სიარულს, ნიჩბოსნობას, კიბის საფეხურზე ასვლას, ცურვას და ლაშქრობას.
ანაერობული კარდიო ვარჯიში კი მაღალი ინტენსივობისაა ის მხოლოდ მოკლე დროში შეიძლება შესრულდეს; სპრინტი ანაერობული კარდიო ვარჯიშის კარგი მაგალითია, ასევე აქტივობები, როგორიცაა თოკზე ხტომა და მთის ველოსიპედით სიარული – და ნებისმიერი ზემოთ ჩამოთვლილი აქტივობა, რომელიც მაღალი ინტენსივობის აჩქარებით შესრულდება.
ნებისმიერ შემთხვევაში, „კარდიო ვარჯიში ხშირად მოიცავს ხანგრძლივ პერიოდს გულისცემის მატებით და ჟანგბადზე მოთხოვნილების ზრდით“ – ამბობს ამერიკელი მწვრთნელი ალექსანდრ როტშტეინი.
კარდიო ვარჯიშის მიზანია გულის, ფილტვებისა და სისხლის მიმოქცევის სისტემის ეფექტურობის გაზრდა, რითაც გაუმჯობესდება თქვენი საერთო ფიზიკური მდგომარეობა და გამძლეობა.
მწვრთნელის განმარტებით, ფიტნესის ეს ტიპი „სასიცოცხლოდ მნიშვნელოვანია ჯანმრთელობისა და კეთილდღეობისთვის, განსაკუთრებით ყოველდღიური ცხოვრების ნორმალური აქტივობების შესრულების უნარისთვის ზედმეტი დაღლილობის გარეშე.“
არის ველოსიპედით სიარული კარდიო ვარჯიში?
დიახ, ველოსიპედით სიარული კარდიო ვარჯიშია – მეტიც: მისი შესანიშნავი ფორმაა. ველოსიპედით სიარული მოითხოვს უწყვეტ მოძრაობას, რაც ზრდის გულისცემას. როდესაც პედლებს ფეხს აჭერთ, თქვენი გული უფრო მეტად მუშაობს, რათა სისხლი კუნთებში გადატუმბოს. ეს მუდმივი ძალისხმევა თქვენს გულ-სისხლძარღვთა სისტემას გამოცდის, რაც დროთა განმავლობაში მას უფრო ეფექტურს ხდის.
ველოსიპედით სიარულის ჩვევას ბევრი სარგებელი მოაქვს, მათ შორის:
გულისცემის გახშირება: ნელი ტემპითაც კი, ველოსიპედით სიარული გულისცემას იმ დონემდე ამაღლებს, რაც ხელს უწყობს გულის ჯანმრთელობას და ფიზიკურ ფორმას. ველოსიპედით სიარული ასევე შეიძლება იყოს ანაერობული (მაღალი ინტენსივობა), რამაც შეიძლება კიდევ უფრო გააუმჯობესოს თქვენი ფიზიკური ფორმა.
გულ-სისხლძარღვთა სისტემის გაუმჯობესებასთან ერთად, თქვენი ფილტვები უფრო ეფექტური ხდება კუნთებისთვის ჟანგბადის მიწოდების თვალსაზრისით.
ის სიჩქარის მომატებისა და გამძლეობის გაუმჯობესების დიდ შესაძლებლობას იძლევა, ამიტომ ეს შესანიშნავი აქტივობაა გრძელვადიანი პროგრესისთვის.
ამასთან, ველოსიპედით სიარულით შეგიძლიათ საათში რამდენიმე ასეული კალორიის დაწვა თითქმის 1000 კალორიამდე. ეს მას ვარჯიშის შესანიშნავ ფორმად აქცევს იმ პირებისთვის, რომლებიც წონაში დაკლებას ან სხეულის წონის მართვას ცდილობენ.
ველოსიპედით სიარული დაბალი დატვირთვისაა, რაც იმას ნიშნავს, რომ ის უფრო ნაზად მოქმედებს სახსრებზე, ვიდრე კარდიო ვარჯიშის მრავალი ფორმა (მაგალითად, სირბილი), და ამავდროულად უზრუნველყოფს მყარ კარდიო ვარჯიშს.
თუ დაბალი ინტენსივობის კარდიოს მარტივ, ხელმისაწვდომ ფორმას ეძებთ, სიარული შეიძლება საუკეთესო ვარიანტი იყოს. თუმცა, უფრო ინტენსიური ვარჯიშისთვის, რომელიც სახსრებისთვისაც მსუბუქია, ველოსიპედით სიარული საუკეთესო არჩევანია.
თუ სახსრების ჯანმრთელობა გაწუხებთ ან ნაკლებად დატვირთულ ვარჯიშს ანიჭებთ უპირატესობას, ველოსიპედით სიარული უკეთესი არჩევანია. სირბილი მისაღები ვარიანტია იმ ადამიანებისთვის, რომლებსაც შეუძლიათ სახსრებზე დატვირთვის ატანა ან არ აქვთ ველოსიპედში ან სტაციონარულ ველოსიპედში ინვესტიციის ჩადების საშუალება.
რაც შეეხება ცურვასთან შედარებას – ცურვა და ველოსიპედით სიარული, ინტენსივობის მიხედვით, მსგავსი რაოდენობის კალორიებს წვავს.
ცურვა სრული სხეულის ვარჯიშია, რომელიც მოიცავს როგორც ზედა, ასევე ქვედა ტანს, ასევე მუცლის კუნთებს. ცურვის დროს უფრო მეტად იტვირთება ხელებისა და მხრების კუნთები, ველოსიპედით სიარულისგან განსხვავებით, რომელიც ძირითადად ქვედა ტანს ამუშავებს. სწორედ ამის მიხედვით უნდა გადაწყვიტოთ, რომელია თქვენთვის უკეთესი და ხელმისაწვდომი.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
