ჯანსაღი ცხოვრების პორტალი
როგორ გამოიყურება მწვრთნელის ვარჯიშის ერთი კვირა – ამ რუბრიკის საშუალებით გამოცემა fitandwell.com-ი ცდილობს დაგვეხმაროს იმის გარკვევაში, თუ როგორ შევიმუშავოთ და შევინარჩუნოთ ეფექტური ვარჯიშის რუტინა.
ამ თემაზე სერტიფიცირებული პერსონალური მწვრთნელი სესილია ჰარისი საუბრობს. 54 წლის ტრენერი, ორგანიზმის ასაკობრივი თავისებურებების გათვალისწინებით, ქალებს მათ შესაძლებლობებს ასწავლის.
სესილია, რომელიც პორტუგალიის ქალაქ ლაგოსში ცხოვრობს, ამბობს, რომ სიცოცხლის გახანგრძლივების მიზნით ვარჯიშობს და კვირაში სამჯერ ძალისმიერ ვარჯიშს ანიჭებს უპირატესობას. ეს ვარჯიშები მოიცავს ყოველდღიურად 8-12 000 ნაბიჯს, პილატესს და მობილურობის მოძრაობებს.
მისი ვარჯიშები 30-45 წუთს გრძელდება. „არ მგონია, რომ სპორტდარბაზში საათობით გატარება დაგჭირდეთ, – ამბობს ის, – კონცენტრაცია, პროგრესი და თანმიმდევრულობა ხანგრძლივობაზე მეტად მნიშვნელოვანია“.
ის დილით, 6 საათზე ვარჯიშს ამჯობინებს. „ეს უზრუნველყოფს, რომ ვარჯიში საქმიანი და ოჯახური ცხოვრების დაწყებამდე დასრულდეს, მაგრამ ასევე მჯერა, რომ ვარჯიშისთვის საუკეთესო დრო ის გრაფიკია, რომელსაც რეალურად დაიცავთ“, – განუცხადა მან Fit&Well-ს.
მისი თქმით, წელს 55 წლის ხდება და 35 წლიდან წონებით ვარჯიშობს. ამბობს, რომ მხოლოდ ესთეტიკისთვის არ ვარჯიშობს და ამას ძვლის სიმკვრივის, კუნთოვანი მასის, მეტაბოლური ჯანმრთელობის, თავდაჯერებულობისა და დამოუკიდებლობისთვის აკეთებს.
„მინდა საკმარისად ძლიერი ვიყო, რომ 80 წლის ასაკში სახლში საყიდლები ავიტანო, ვიმოგზაურო, რეტრიტებს ვსტუმრობდე და საკუთარ სხეულში ძლიერად ვიგრძნო თავი. კუნთების შენარჩუნება შუახნის ასაკშიც კი საკმაოდ რთულია – ეს არის ნამდვილი მიზანი,“ – აღნიშნავს სესილია ჰარისი.
მისი თქმით, „მოტივაცია ემოციურია, დისციპლინა კი სტრუქტურული.“
„ჩემს თავს ვახსენებ, როგორ ვგრძნობ თავს ვარჯიშის შემდეგ – უფრო მშვიდად, უფრო ნათლად, უფრო ძლიერად და უფრო თავდაჯერებულად. განსაკუთრებით მენოპაუზის დროს, მოძრაობა წამალია“ – აცხადებს მწვრთნელი.
ჰარისის მიზანია კვირაში ხუთიდან ექვსამდე სტრუქტურირებული ვარჯიშის შესრულება.
მისი თქმით, ის, თუ რამდენად მძიმე წონებს ასწევთ და რამდენი გამეორება გაქვთ, აჩვენებს, თუ როგორ უმჯობესდება თქვენი ძალა, რადგან სხეული ადაპტაციას განიცდის.
ის ასევე ხაზს უსვამს, რომ ფორმაში ყოფნისა და ძალის მომატებისთვის სწრაფი მეთოდი არ არსებობს. „40 წლის შემდეგ ფიტნესი ცხოვრების წესია და არა ექვსკვირიანი პროექტი, ამიტომ რეალისტური უნდა იყოს,“ – აცხადებს ტრენერი.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
