ჯანსაღი ცხოვრების პორტალი
ბოლო პერიოდში მსოფლიოში, მათ შორის საქართველოში, ძალიან პოპულარულია პილატესი.
რა არის პილატესი? ესაა ვარჯიშების სისტემა კუნთების გაძლიერებისა და მოქნილობისთვის. სახელწოდება მოდის ჯოზეფ პილატესისგან, რომელმაც ეს სისტემა გერმანიაში, მეცხრამეტე საუკუნის ბოლოს შექმნა. ეს მეთოდი იდეალურია მათთვის, ვინც ეძებს დაბალინტენსიურ, მაგრამ ეფექტურ ვარჯიშებს.
პილატესი – ესაა დაბალი დატვირთვის ვარჯიშები, რომლებიც ადამიანს აძლევს ოპტიმალურ ძალას კუნთოვანი ბალანსისთვის, ის ასევე გვეხმარება მოძრაობასა და სუნთქვაში ყოველდღიურ საქმიანობაში, მეტი თავისუფლებითა და ნაკლები ტკივილით.
რა გავლენას ახდენს პილატესი სხეულზე?
პილატესი აუმჯობესებს სხეულზე კონტროლს, ხელს უწყობს მობილობასა და მოქნილობას.
აუმჯობესებს ტანადობას.
პილატესის სპეციალისტი, ექიმი ტაილერ უილერი პილატესის უპირატესობებს შორის ასახელებს: ტრავმების თავიდან აცილებას, სისხლის მოძრაობისა და ჟანგბადის მიწოდების გაუმჯობესებას, ენერგიის მოზღვავებას და სტრესის შემცირებას. გარდა ამისა, ეს ვარჯიშები აძლიერებს იმუნურ სისტემას, აუმჯობესებს კოგნიტურ ფუნქციებს და ძილის ხარისხს, ამაგრებს ძვლებს, აუმჯობესებს განწყობას.
პილატესი გამოიყენება ორსულებშიც. სპეციალური, პრენატალური ვარჯიშები, გარდა ენერგიისა და ფიზიკური ფორმის შენარჩუნებისა, ეხმარება ქალს მუცლის დიასტაზის დროს. ესაა მდომარეობა, რომლის დროსაც მუცლის სწორი კუნთის ბოჭკოების განცალკევება ხდება.
რა შემთხვევაში არ შეიძლება პილატესის ვარჯიშების კეთება? ესაა ოპერაციის შემდგომი და ქრონიკული დაავადებების გამწვავების პერიოდები. დანარჩენ შემთხვევებში, მას უკუჩვენებები, პრაქტიკულად, არ გააჩნია. თუმცა გარკვეულ პირობებში აუცილებელია სპეციალისტის კონსულტაცია.
შეგიძლიათ, ეს პრაქტიკა სახლშიც გამოიყენოთ. ამისთვის დაგჭირდებათ სპორტული ხალიჩა და მცირე ინვენტარი. ვარჯიშისას მოძრაობები უნდა იყოს ნელი და არა მკვეთრი. არ უნდა აკეთოთ რითმული გამეორებები.
როგორ უნდა დაიწყოთ პილატესის ვარჯიშები?
მნიშვნელოვანია, ყურადღება მიაქციოთ სუნთქვას.
სუნთქვა
დაწექით ზურგზე, მოხარეთ ფეხები მუხლებში და ტერფები იატაკზე დადეთ, ხელები მკერდზე დაიდეთ. შეისუნთქეთ ცხვირით ისე, რომ მკერდზე დადებული ხელები აიწიოს. ამოისუნთქეთ და იგრძენით, როგორ ეშვება თქვენი გულმკერდი ქვემოთ.
გაიმეორეთ ეს ყველაფერი 3-5-ჯერ. სწორი სუნთქვა აუცილებელია მოსამზადებლად. ის იწვევს კუნთების გახურებას და ამზადებს მათ შემდგომი დატვირთვისთვის, ამარაგებს ჟანგბადით.
ხიდი
დაწექით ზურგზე, ფეხები მუხლებში მოხარეთ, ტერფები კი თეძოების სიგანეზე, პარალელურად მოათავსეთ. ბალიში ან მინი-ბურთი მოათავსეთ თეძოებს შორის.
ამოისუნთქეთ, ნელა მოუჭირეთ ბურთს, დაეყდრენით იატაკს ტერფებით და ხერხემალი ხალიჩიდან ასწიეთ. დაიწყეთ მენჯის აწევით, რასაც უნდა მოჰყვეს ზურგის ქვედა, შემდეგ კი შუა ნაწილი, ვიდრე არ შეიქმნება სწორი ხაზი მხრებსა და მუხლებს შორის.
შეისუნთქეთ და ასე გაჩერდით გარკვეული დროის განმავლობაში. შემდეგ ამოისუნთქეთ და ზურგი იატაკზე დაუშვით.
გაიმეორეთ ეს მოძრაობები 5-ჯერ. შეეცადეთ მხრები და კისერი მოდუნებულ მდგომარეობაში გქონდეთ, ზურგი კი არ შეზნიქოთ.
გვერდული
ეს ვარჯიში განკუთვნილია როგორც დამწყები, ისე საშუალო დონის მომზადების ადამიანისთვის.
დაწექით გვერდზე, დაეყრდენით წინამხარსა და იდაყვს, მუხლებში მოხარეთ ორივე ფეხი. მუხლები და თეძოები ერთ ხაზზე უნდა იყოს.
ამოსუნთქვაზე წინამხარი დააყრდენით იატაკს, თეძოები კი ასწიეთ. შემდეგ შეისუნთქეთ და თეძოები იატაკზე დაუშვით. ამოისუნთქეთ, რომ თეძოები კვლავ ასწიოთ.
ეს მოძრაობა 8-10-ჯერ გაიმეორეთ, შემდეგ კი იგივე მოძრაობები მეორე მხრიდან შეასრულეთ. წარმოიდგინეთ, რომ იღლიით ჩოგბურთის ბურთს უჭერთ, რომ არ დავარდეს. არ დაჭიმოთ კისერი.
დაიმახსოვრეთ, რომ პილატესის ვარჯიშები თქვენი ფიზიკური მომზადების დონის მიხედვით უნდა შეარჩიოთ. ამის შემდეგ კი პროგრამას პერიოდულად დაუმატეთ ახალი მოძრაობები და მათი რიგითობა შეცვალეთ.
პილატესის რეგულარული ვარჯიშები შედეგებს მალე იძლევა. პირველ რიგში, ეს განწყობის გაუმჯობესებაში გამოიხატება.
პილატესი ნიშნავს ჯანმრთელ ხერხემალსა და სახსრებს, ადამიანს ხდის უფრო მოქნილს და ძლიერს.
პილატესს მინიმალური უკუჩვენებები აქვს, თუმცა აუცილებელია, პროგრამა ნელა, მკვეთრი მოძრაობების გარეშე შევასრულოთ.
* * *
უნდა გაითვალისწინოთ, რომ ქრონიკული დაავადებების ან ჯანმრთელობის სხვა პრობლემების შემთხვევაში, უმჯობესია, კონსულტაციები ექიმთან გაიაროს, რათა ფიზიკური დატვირთვა თქვენი ჯანმრთელობის მდგომარეობის შესაბამისი იყოს.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
