ჯანსაღი ცხოვრების პორტალი
ბევრი ადამიანი დილით შებოჭილობის განცდით იღვიძებს. ასაკთან ერთად კი სახსრები სულ უფრო ხშირად გამოსცემს „ჭრაჭუნის“ ხმას. არც დილის გაჭიმვები ამსუბუქებს ადამიანის მდგომარეობას ისე, როგორც ეს ადრე ხდებოდა.
თუ ასეთი სიტუაცია თქვენთვის ნაცნობია, გამოსავალი არსებობს – ამ თემაზე სტატიას გამოცემა Eat This, Not That აქვეყნებს.
ფიზიკური მომზადების სერტიფიცირებული სპეციალისტი ოსტინ მარტინესი გამოცემას იმ უნიკალურ გამოცდილებას უზიარებს, რომელიც ათ წელზე ხანგრძლივი კარიერის განმავლობაში დაუგროვდა.
რა ხდება ორგანიზმში 50 წლის ასაკის შემდეგ
ოსტინ მარტინესის თქმით, ასაკთან ერთად სწორი გაჭიმვა ძალიან მნიშვნელოვანია.
„ამ ასაკში მიმდინარე ცვლილებები კუნთოვან ქსოვილსა და სახსრებს უკავშირდება. კუნთოვანი მასის, ძალებისა და ფუნქციის შემცირება, რასაც სარკოპენია ჰქვია, ამ პროცესის საფუძველია,“ – განაცხადა მან.
სპეციალისტი ხაზგასმით ამბობს იმასაც, რომ კუნთების ელასტიურობა იკარგება და ისინი უფრო მყარი ხდება, კუნთების ბოჭკოები სწრაფი შეკუმშვის უნარს კარგავს და ნელა კუმშვას იწყებს. ეს ცვლილებები პირდაპირ ახდენს გავლენას 50 წლისა და უფროსი ასაკის ადამიანების გაჭიმვის უნარზე.
გაჭიმვის ხანგრძლივობა
კვლევები ადასტურებს, რომ მაქსიმალური ეფექტის მისაღწევად აუცილებელია გაჭიმვა მინიმუმ 30 წამის განმავლობაში გრძელდებოდეს. ეს დრო შემთხვევით არაა შერჩეული და ემყარება კუნთების რეაქციას გაჭიმვაზე ხანდაზმულ ასაკში.
თუმცა გაჭიმვის პროცედურის 2 წუთზე დიდხანს გაგრძელების შემთხვევაში, განსაკუთრებით იმ შემთხვევაში, თუ ამ პრაქტიკას ახლა იწყებთ, შესაძლოა კუნთებს ზედმეტი დატვირთვა დააწვეს. ამან კი, შეიძლება, ტკივილი და ტრავმები გამოიწვიოს. ამიტომ, ოსტინი თქმით, გაჭიმვის ოპტიმალური ხანგრძლივობა 30 წამიდან ერთ წუთამდეა.
გაჭიმვების არასწორი ტექნიკა
კუნთების ასაკობრივ ცვლილებასთან ერთად გაჭიმვების ტექნიკა სულ უფრო მნიშვნელოვანი ხდება. მარტინესის თქმით, არასწორმა ტექნიკამ შესაძლოა იმ კუნთების გაჭიმვა გამოიწვიოს, რომლებიც თქვენი სამიზნე არ არის. ეს კი არა მხოლოდ ამცირებს გაჭიმვების ეფექტს, არამედ შეიძლება მოძრაობის პრობლემებიც კი გამოიწვიოს.
ჟურნალ The Journal of Physiology-ში ჯერ კიდევ 2020 წელს გამოქვეყნებული კვლევა ადასტურებს, რომ გაჭიმვების სწორი ტექნიკა სისხლის მოძრაობას აუმჯობესებს, ასევე აძლიერებს კუნთების მოქნილობას, თუმცა ამ შედეგისთვის აუცილებელია, გაჭიმვები სწორი ტექნიკით გავაკეთოთ.
შეცდომები სუნთქვისას
ასაკთან ერთად კუნთები უფრო მაგრდება, ამიტომ სუნთქვა სულ უფრო მნიშვნელოვანი ფაქტორი ხდება ეფექტიანი გაჭიმვებისთვის.
ღრმა დიაფრაგმული სუნთქვა გაჭიმვების დროს კუნთებს მოდუნებაში ეხმარება. ეს კი უფრო კარგი შედეგის დადგომას უწყობს ხელს. ეს განსაკუთრებით მნიშვნელოვანია, რამდენადაც დაჭიმული და მაგარი კუნთები მოითხოვს როგორც ფიზიკურ, ისე მენტალურ მოდუნებას გაჭიმვებისას.
პრაქტიკის თანმიმდევრულობა
ერთ-ერთი ყველაზე გავრცელებული და შეუმჩნეველი შეცდომაა ის, როცა ადამიანი გაჭიმვას არარეგულარულად, შემთხვევიდან შემთხვევამდე მიმართავს. ისევე როგორც ფიზიკური ვარჯიშის დროს, ერთი გაჭიმვა გრძელვადიან ცვლილებებს ვერ მოიტანს. ეფექტი რეგულარობით მიიღწევა.
კვლევები ადატურებს, რომ რეგულარული და სწორი გაჭიმვები აუმჯობესებს სისხლის მიმოქცევას – ეს კი განსაკუთრებით მნიშვნელოვანი ასაკთან ერთადაა.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
