ჯანსაღი ცხოვრების პორტალი
ბალანსი – ისევე როგორც ძალა, გამძლეობა, მოქნილობა და მობილურობა – არ არის ერთხელ და სამუდამოდ ჩამოყალიბებული თვისება. ეს არის უნარი, რომელიც უნდა ვავარჯიშოთ და შევინარჩუნოთ.
ასეთია ჯეკ კლაქსტონის, David Lloyd Clubs-ის მთავარი მწვრთნელის, გზავნილი, რომელიც მოგვიწოდებს, თითოეულმა ჩვენგანმა დღეში მინიმუმ ორი წუთი ერთ ფეხზე დგომაში გავატაროთ.
„რამდენიმე წლის წინ, ერთმა კლიენტმა გამიზიარა რუტინა, რომელიც მას მისმა ფიზიოთერაპევტმა ურჩია და მას შემდეგ მე მას ვიყენებ“, – განუცხადა კლაქსტონმა გამოცემა Fit&Well-ს.
მწვრთნელი ამბობს, რომ ამ მარტივი რუტინის შესრულება აძლიერებს ბარძაყის, კოჭებისა და მუხლების გარშემო სტაბილიზატორ კუნთებს, რაც გავლენას ახდენს ჩვენს წონასწორობაზე.
როგორ უნდა გავაკეთოთ
რუტინას ოთხი ეტაპი აქვს, რომელთაგან თითოეული წინას ეფუძნება:
1. დადექით სწორად. ფეხი ასწიეთ წინ ისე, რომ ქუსლი იატაკს ოდნავ მოშორდეს, ფეხი სწორად შეინარჩუნეთ.
2. მუხლი მოხარეთ და თეძოს სიმაღლემდე ასწიეთ.
3. აწეული ფეხი გაასწორეთ.
4. ეს პოზიცია დახუჭული თვალებით შეინარჩუნეთ.
კლექსტონის თქმით, თითოეული ეტაპის შესრულება 30 წამის განმავლობაში უნდა შეძლოთ, სანამ შემდეგზე გადახვალთ.
როდესაც ბოლო ეტაპს მიაღწევთ, ჩაინიშნეთ, რამდენ ხანს შეგიძლიათ ამ პოზაში დარჩენა დახუჭული თვალებით – ეს არის თქვენი შედეგი, რომელიც უნდა გააუმჯობესოთ.
„ამ ვარჯიშის კეთება გააუმჯობესებს სტაბილურობას და სახსრების ძალას. ეს არის ატრიბუტები, რომლებიც სასიცოცხლოდ მნიშვნელოვანია ყოველდღიური ცხოვრებისთვის და განსაკუთრებით ხანში შესული ადამიანებისთვის“, – ამბობს კლაქსტონი.
მისი თქმით, ბალანსის პროგრესირების ამ სავარჯიშოს ის ყოველ საღამოს, კბილების გახეხვისას აკეთებს, თუმცა მისი გაკეთება შესაძლებელია ყოველთვის, როცა ხუთი თავისუფალი წუთი გექნებათ.
„ამ სავარჯიშოს წლებია ვიყენებ და შემიძლია ერთი წუთით თვალები დახუჭული მქონდეს, მაგრამ რა დონეზეც არ უნდა იყოთ, დაითვალეთ დრო და ეცადეთ, ეს შედეგი დღითიდღე გააუმჯობესოთ“, – ამბობს კლექსტონი.
თუ ვერტიკალურ მდგომარეობაში დარჩენა გიჭირთ, კლაქსტონი შემდეგ რჩევებს გვთავაზობს:
თუ მოძრაობას გახელილი თვალებით ასრულებთ, მხედველობის ფოკუსირება ერთ წერტილზე მოახდინეთ.
ხელები გვერდებზე გაშალეთ.
ფეხის თითებით იატაკს „მოეჭიდეთ.“
თუ ამ მოძრაობას დახუჭული თვალებით ასრულებთ, ფეხი იატაკთან ახლოს ასწიეთ, რათა წონასწორობის დაკარგვის შემთხვევაში სწრაფად აღიდგინოთ ის.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
