ჯანსაღი ცხოვრების პორტალი
მეცნიერულადაა დადასტურებული, რომ რეგულარული ვარჯიში მნიშვნელოვან როლს ასრულებს ჯანმრთელობის შენარჩუნებასა და დაავადებების პრევენციაში. ის აძლიერებს თქვენს იმუნურ სისტემას და ეხმარება მას ვირუსულ და ბაქტერიულ ინფექციებთან ბრძოლაში.
თუმცა, ამცირებს თუ არა ეს გრიპით დაინფიცირების რისკებს? ან როგორ მოვიქცეთ, თუ უკვე გვაქვს სიმპტომები? უნდა აიძულოთ თუ არა თავი, მაინც ივარჯიშოთ? ამის შესახებ სტატიას გამოცემა webmd.com აქვეყნებს.
პასუხია: შესაძლოა.
ვარჯიში, როგორც გაციებისა და გრიპისგან დაცვის მეთოდი
ვარჯიშის დროს ლეიკოციტები, რომლებიც ინფექციებს ებრძვიან – თქვენს სხეულში უფრო სწრაფად მოძრაობენ და უკეთ ასრულებენ თავიანთ ფუნქციას.
ექსპერტები ამბობენ, რომ ყოველდღიურად მინიმუმ 30 წუთი უნდა ივარჯიშოთ ზომიერი კარდიო ვარჯიშებით, როგორიცაა სიარული, ცურვა, ველოსიპედით სიარული ან სირბილი.
რეგულარული ვარჯიში შეიძლება საუკეთესო გამოსავალი იყოს. არ არის აუცილებელი, მარათონის მანძილი დაფაროთ. ზომიერი აქტივობა ყველაფერია, რაც გჭირდებათ.
ზოგიერთი კვლევა აჩვენებს, რომ „საშუალო ინტენსივობის“ ვარჯიშმა შეიძლება შეამციროს გაციების შემთხვევები. ამ ტიპის აქტივობა მოიცავს ისეთ ვარჯიშებს, როგორიცაა ყოველდღიურად 20-30 წუთიანი სეირნობა, სპორტდარბაზში დღეგამოშვებით სიარული ან კვირაში რამდენჯერმე ბავშვებთან ერთად ველოსიპედით სეირნობა.
American Journal of Medicine-ში გამოქვეყნებული ერთ-ერთი კვლევის თანახმად, ქალებს, რომლებიც 1 წლის განმავლობაში ყოველდღე ნახევარი საათის განმავლობაში დადიოდნენ, გაციების შემთხვევები ორჯერ ნაკლები ჰქონდათ, ვიდრე მათ, ვინც არ ვარჯიშობდა. მკვლევრებმა აღმოაჩინეს, რომ რეგულარულმა სიარულმა შეიძლება გამოიწვიოს ლეიკოციტების ზრდა, რომლებიც ინფექციებს ებრძვიან.
კიდევ ერთ კვლევაში მკვლევარებმა აღმოაჩინეს, რომ 65 წლის ასაკის ადამიანებში, რომლებიც რეგულარულად ვარჯიშობდნენ, განსაკუთრებული ტიპის ლეიკოციტების – T-უჯრედების – რაოდენობა ისეთივე მაღალი იყო, როგორც 30 წელს გადაცილებულ ადამიანებში.
აქტივობის მაღალ დონეს სხვა სარგებელიც აქვს, როგორიცაა ნაკლები სტრესი და უკეთესი ძილი. სტრესი ცუდია თქვენი სხეულისა და გონებისთვის. მისი შემსუბუქება შეგიძლიათ რეგულარული ვარჯიშით. ასევე, იძინეთ 7-8 საათი ღამით, რადგან ეს ასევე ხელს უწყობს თქვენი ორგანიზმის კარგ ფორმაში შენარჩუნებას.
მეორეს მხრივ, ზედმეტმა ვარჯიშმა, როგორიცაა საათობით სპორტდარბაზში გატარება ან მარათონებზე სირბილი, შეიძლება დაასუსტოს თქვენი იმუნური სისტემა. ექსტრემალურმა ვარჯიშმა შეიძლება შეამციროს თქვენს სისხლში ლეიკოციტების რაოდენობა და სტრესის ჰორმონების დონე გაზარდოს.
შეგვიძლია თუ არა ვარჯიში, თუ გრიპი გვაქვს?
ამ დროს ეცადეთ, მშვიდად იყოთ. დასვენება თქვენს სხეულს გამოჯანმრთელების შანსს აძლევს. თქვენი იმუნური სისტემა საუკეთესოდ მუშაობს, როდესაც ის გადაჭარბებულად არ არის დატვირთული.
თუ სიცხე გაქვთ, გამოტოვეთ ვარჯიში. ადამიანებს, როგორც წესი, გრიპის დროს სიცხე 2-დან 5 დღემდე აქვთ. ეს ნიშნავს, რომ თქვენი სხეული ინფექციას ებრძვის. მაღალი ტემპერატურა ორგანიზმიდან ტენიანობას გამოდევნის ისევე, როგორც ვარჯიში. ამან კი შეიძლება გამოჯანმრთელების პროცესი შეაფერხოს.
ასევე, გრიპი გადამდებია. სიმპტომების დაწყებიდან 7 დღის განმავლობაში თქვენ მისი გამავრცელებელი ხართ. თუ სხვა ადამიანებთან ერთად ვარჯიშობთ, დაელოდეთ სანამ სიცხე არ დაიკლებს და ნორმალურ ნიშნულზე არ დარჩება მინიმუმ 24 საათის განმავლობაში, სანამ თქვენს რუტინას დაუბრუნდებით.
როგორ მოვიქცეთ გაციების დროს?
ასეთ დროს ვარჯიში, როგორც წესი, უსაფრთხოა, თუ თქვენს სხეულს მოუსმენთ. თუმცა ყურადღება უნდა მიაქციოთ გარკვეულ სარისკო სიტუაციებს.
ფიზიკური აქტივობა აჩქარებს გულისცემას, მაგრამ ასევე შეიძლება გამოყენებულ იქნას ზოგიერთი მედიკამენტი. ამიტომ, ვარჯიშისა და პრეპარატების კომბინაციამ შეიძლება გულისცემის გაძლიერება გამოიწვიოს. შეიძლება სუნთქვაც გაგიჭირდეთ.
როდესაც გაციებას სიცხე ახლავს თან, ვარჯიშმა შეიძლება კიდევ უფრო დატვირთოს თქვენი სხეული. ამიტომ, დაელოდეთ რამდენიმე დღე, სანამ ვარჯიშების ჩვეულ პროგრამას დაუბრუნდებით.
ასევე, ფრთხილად იყავით, რომ არ ივარჯიშოთ ძალიან ინტენსიურად, როდესაც გაციებული ხართ. ამან შეიძლება გააუარესოს თქვენი მდგომარეობა და შეანელოს გამოჯანმრთელების პროცესი.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
