ჯანსაღი ცხოვრების პორტალი
ჩვენს პორტალზე სიარულის მნიშვნელობის შესახებ არაერთი სტატიაა განთავსებული. ესაა მარტივად შესასრულებელი ფიზიკური აქტივობა, რომელსაც ადამიანისთვის უამრავი სარგებლის მოტანა შეუძლია, ყოველგვარი რისკის გარეშე.
სიარული არის უდავო ლიდერი ცხიმის დაწვის მეთოდებს შორის. ესაა მარტივი, ხელმისაწვდომი და დაბალი ინტენსივობის აქტივობა, რომლის კეთებაც პრაქტიკულად ნებისმიერ ადამიანს შეუძლია.
ამ თემაზე გამოცემა Eatthis-ზე გამოქვეყნებული სტატიის თანახმად, სიარული არის კალორიების დაწვის, მეტაბოლიზმის გაუმჯობესებისა და ცხიმისგან განთავისუფლების პროცესის დაჩქარების ეფექტიანი მეთოდი. ამასთან, ის სახსრებისთვის საზიანო არ არის.
პირველ რიგში, ესაა აერობული ვარჯიში, რომელიც ცხიმს საწვავის სახით იყენებს. ზომიერ ტემპში სიარული ცხიმის წვის პროცესს ოპტიმალურ ზონაში ინარჩუნებს. შედეგია ცხიმის სტაბილური, თანმიმდევრული დაწვა სტრესისა და დაღლილობის გარეშე.
სიარულის უპირატესობა არის ის, რომ ამის კეთება მთელი ცხოვრების განმავლობაში შეგიძლიათ. გასეირნება სამსახურის წინ, შესვენებისას ან საღამოს მარტივად ჩაჯდება ცხოვრების ნებისმიერ გრაფიკში.
გარდა ამისა, სიარული მადას არეგულირებს და სისხლში შაქრის დონეს ასტაბილურებს, ასევე ამცირებს სტრესის ჰორმონებს, რომლებიც, როგორც ცნობილია, საკვების მოთხოვნილებას ზრდის. ამიტომ სიარული თავიდან აგარიდებთ უაზრო ჭამას დღის განმავლობაში.
ბევრი ადამიანი არ ითვალისწინებს იმას, რომ სამსახურით, არასაკმარისი ძილით ან ზედმეტად ინტენსიური ვარჯიშებით გამოწვეულმა სტრესმა, შესაძლოა, ცხიმის დაწვის პროცესი შეანელოს.
სტრესის ჰორმონის კორტიზოლის სიჭარბე ცხიმის დაგროვებას უწყობს ხელს, განსაკუთრებით – მუცელზე. სიარული კი ამ პროცესის საპირისპირო მოვლენაა – ის ხელს უწყობს ცხიმის წვას და კორტიზოლოს დონეს აკონტროლებს.
დადასტურებულია, რომ სადილის შემდეგ მხოლოდ 30-წუთიანი სიარულიც სისხლში შაქრის დონეს ამცირებს, რაც წონის გრძელვადიანი კონტროლის შესანიშნავი შესაძლებლობაა.
გარდა ამისა, სიარული ათავისუფლებს ენდორფინებს და, შესაბამისად, ამცირებს შფოთვას და ზრდის მოტივაციას. ის განაპირობებს გონების გადატვირთვას და ადამიანს აძლევს მოტივაციას, შეინარჩუნოს ცხოვრების ჯანსაღი წესი და სასარგებლო ჩვევები.
არსებობს სიარულის 6 სახეობა, რომლებისგანაც შეგიძლიათ თქვენთვის სასურველი აირჩიოთ
სწრაფი სიარული
იარეთ ტემპში, რომლის დროსაც შეგიძლიათ საუბარი, თუმცა არა – სიმღერა. შეეცადეთ, ასეთი ტემპით 30-45 წუთის განმავლობაში იაროთ, რათა ცხიმის დაწვის ზონაში დარჩეთ.
„დახრილი“ სიარული
ისარგებლეთ ბორცვებით ან დახრილი სარბენი ბილიკით, რათა გაზარდოთ ინტენსივობა სირბილის გარეშე. ეს ზრდის კალორიების წვას, ასევე ზემოქმედებს საჯდომსა და ტორსზე.
ინტერვალური სიარული
შეუნაცვლეთ ერთმანეთს სიარულის ზომიერი ტემპი და მოკლე ნახტომები. ეს მეთოდი ზრდის გულის შეკუმშვების სიხშირეს და ცხიმის დაწვის ტემპს.
სიარული სიმძიმეებით
სიარულისას თან ატარეთ მძიმე ჟილეტი ან ზურგჩანთა, რათა წინააღმდეგობა გაიზარდოს და კალორიების დაწვის ტემპიც გაძლიერდეს.
სიარული კვების შემდეგ
კვების შემდეგ 10-15-წუთიანი სიარულიც ხელს უწყობს შაქრის დონის დასტაბილურებას და აუმჯობესებს საჭმლის მონელების პროცესს.
ხანგრძლივი, აუჩქარებელი სეირნობა
60-წუთიანი მოდუნებული, აუჩქარებელი სიარული სტრესსაც შეამცირებს და ჯანმრთელობის ზოგად მდგომარეობასაც გაგიუმჯობესებთ, ამასთან ამ დროს თქვენი ცხიმის მარაგებიც დაიწყებს „დაცლას,“ რაც წონის კლებაზე დადებითად აისახება.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
