ჯანსაღი ცხოვრების პორტალი
ზაფხულის მზიანი დღეები იდეალური დროა განტვირთვისა და ამავდროულად, საკუთარი ჯანმრთელობის გაუმჯობესებისთვის. ცურვა – ეს არის არა მხოლოდ სიცხესთან გამკლავების მეთოდი, არამედ ერთ-ერთი საუკეთესო ვარჯიში მთელი სხეულისთვის, რომელიც თქვენს გულზე, კუნთებზე, სახსრებსა და მენტალურ კეთილდღეობაზე დადებითად აისახება.
ჯანმრთელობისა და ფიტნეს ცენტრის DeTar-ის დირექტორის სტეფანი შუკენბროკის განცხადებით, ესაა დაბალინტენსიური, თუმცა მაღალეფექტიანი ვარჯიში, რომელიც სახსრებზე რბილად მოქმედებს და ეფექტიანად აძლიერებს გულ-სისხლძარღვთა სისტემას.
ცურვის დროს თქვენი სხეული წყლის წინააღმდეგობას ლახავს. ფიზიკური აქტივობის ეს ფორმა აძლიერებს გულსა და ფილტვებს, რადგან ისინი აქტიურად მუშაობენ და კუნთები ჟანგბადით მარაგდება.
ეს აერობული დატვირთვა აუმჯობესებს სისხლის მიმოქცევას, ხელს უწყობს არტერიული წნევის შემცირებას და აუმჯობესებს გამძლეობას. ცურვას ტონუსში მოჰყავს კუნთები და ზრდის მოქნილობას, ის კუნთების ყველა ძირითად ჯგუფს რთავს მოძრაობაში, მათ შორისაა მხრების, ზურგის, ფეხების, მუცლისა და თეძოების კუნთები, ასევე დუნდულები.
წყალი აკავებს სხეულის წონის დაახლოებით 90%-ს, რის გამოც ცურვა ნებისმიერი ასაკის ადამიანისთვის მისაღები აქტივობაა, განსაკუთრებით მათთვის, ვისაც აქვს ართრიტი, სახსრების სხვა პრობლემები ან ტრავმების შემდეგ აღდგენა სურს.
„წყალში სხეულის მოძრაობა საშუალებას გვაძლევს, შევასრულოთ მაღალინტენსიური მოძრაობები დაბალი დატვირთვით. წყლის ბიძგების ძალას სახსრებზე დატვირთვა მინიმუმამდე დაჰყავს, რაც ტრავმების რისკს ამცირებს და ამასთან, ეს ეფექტიანი ვარჯიშია,“ – აღნიშნა შუკენბროკმა.
გარდა ამისა, ცურვა ხელს უწყობს ფსიქიკურ ჯანმრთელობას. რითმული სუნთქვა და სხეულის მოძრაობაზე კონცენტრაცია გაცნობიერებულობის ტექნიკას გულისხმობს, რაც სტრესისა და შფოთვის შემცირებას უწყობს ხელს და ძილის ხარისხს აუმჯობესებს. ცურვას მოაქვს როგორც ფიზიკური, ისე ემოციური სარგებელი და, შედეგად, ზოგად კეთილდღეობას განაპირობებს.
„საქმე მხოლოდ ფიზიკურ ფორმას არ ეხება – საუბარია უკეთეს განწყობაზე და უკეთეს ცხოვრებაზე,“ – ამბობს შუკენბროკი.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
