ჯანსაღი ცხოვრების პორტალი
„სნექ-ვარჯიშები“ – ეს ტერმინი პირველად კარდიოლოგმა ჰარვარდ ჰარტლიმ, 2007 წელს გამოიყენა და მას შემდეგ, კვლევებმა ამ მინი-ვარჯიშების სარგებელი არაერთხელ დაადასტურა. „სნექ-ვარჯიშები“ – ესაა აქტივობის მცირე „აფეთქებები“ – 30 წამიდან 5, მაქსიმუმ 10 წუთამდე ხანგრძლივობის, რომლებიც ნებისმიერი სახის მოძრაობას გულისხმობს. შესაძლოა, ეს იყოს კიბეზე ასვლა, სიარული, ბუქნები და ცეკვა.
კვლევის თანახმად, რომელიც ჟურნალ Exercise and Sport Sciences Reviews-ში გამოქვეყნდა, დღეში სამჯერ 15-30 წამიანი „სნექების“ გაკეთება კარდიორესპირატორულ სისტემაზე დადებითად მოქმედებს.
JAMA Oncology-ში გამოქვეყნებული კვლევის თანახმად, დღეში 4,5-წუთიანი ინტენსიური, წყვეტილი ვარჯიშები კიბოს დაავადებებს 31-32%-ით ამცირებს.
ასეთი ვარჯიშების უპირატესობა ასევე ვრცლდება ტვინის ჯანმრთელობაზე. ყოველდღიურად ზომიერი აქტივობა ამცირებს დემენციის განვითარების რისკს.
„რაიმის გაკეთება უკეთესია, ვიდრე არაფრის კეთება,“ – განაცხადა პერსონალურმა მწვრთნელმა ლონდონიდან მაიკლ ბეთსმა. მისი თქმით, თუ თქვენ დროდადრო მოძრაობთ და საკუთარ სხეულს მცირე დატვირთვებს უქმნით, მისი მდგომარეობა უმჯობესდება.
მცირე ცვლილებებმა შესაძლოა, დიდ ჯილდომდე მიგიყვანოთ
„სნექ-ვარჯიშების“ მომხრეა ექიმი და ფსიქოლოგი სუპატრა ტოვარი, რომლის თქმითაც, ქცევის ცვლილება მცირე ნაბიჯებით იწყება.
მისი თქმით, მცირე ცვლილებების ჩვევად ჩამოყალიბებისთვის საჭიროა ისინი მივაბათ გარკვეულ ქმედებებს, რომლებსაც ყოველდღიურად ვაკეთებთ. მაგალითად, თუ გაღვიძებისთანავე კბილებს იხეხავთ, დაიწყეთ ხტომა ან აზიდვები მაშინვე, როგორც კი კბილის ჯაგრისს გვერდით გადადებთ.
ექსპერტების თქმით, „სნექების“ ერთ-ერთი ყველაზე მარტივი ფორმა სიარულია. ეს, შესაძლოა, იყოს ქალაქგარეთ ან, უბრალოდ, შენობის გარშემო სიარული. როგორც კი თქვენ მიეჩვევით ყოველდღიურ სიარულს, შეგიძლიათ ინტერვალურ ვარჯიშებზე გადახვიდეთ და ტემპი 20 წამით გაზარდოთ, შემდეგ შეანელეთ სვლა 10 წამით და გაიმეორეთ ეს თანმიმდევრობა რამდენჯერმე.
თუმცა მხოლოდ სიარულით არ დაკმაყოფილდეთ. მაგალითად, კედლიდან აზიდვები გაგიძლიერებთ ხელებს, ბუქნები კი შესანიშნავი შესაძლებლობაა ფეხების გაძლიერებისთვის.
თუ დააპირებთ კიბეზე ასვლას, დაიწყეთ ამის კეთება უფრო სწრაფად, ვიდრე ამას ჩვეულებრივად აკეთებდით.
ტოვარის თქმით, სახლის დალაგებაც ვარჯიშია ისევე, როგორც ბავშვებთან თამაში და უბრალოდ, „მოუსვენრობაც“ კი.
ტოვარი ყურადღებას ამახვილებს „ლურჯ ზონებში“ მცხოვრე ხალხზე. ესაა ზონები, სადაც ადამიანები ყველაზე დიდხანს ცოცხლობენ. ეს ზონებია ოკინავა, იაპონია, კუნძული სარდინია.
„ისინი მუდმივად მოძრაობენ, აკეთებენ NEAT-ის ვარჯიშებს დღის განმავლობაში,“ – განაცხადა მან.
ცნობისთვის: NEAT-ი გამოხატავს ენერგიის ხარჯვის პროცესებს, რომლებიც არ მოიცავს მიზანმიმართულ ფიზიკურ ვარჯიშს. ეს შეიძლება იყოს სიარული, კიბეზე ასვლა, სახლის საქმეები (მაგალითად, დასუფთავება ან ჭამა), სამსახურში აქტიურობა, მაღაზიაში სიარული, ბაღში მუშაობა და სხვა.
ექსპერტის თქმით, ამ აქტივობებს, თუკი ისინი ყოველდღე კეთდება, დამატებით 2 ათასი კალორიის დაწვა შეუძლია.
„თქვენი სხეული საკმაოდ ზარმაცია. მას არ უყვარს ბევრი საქმის კეთება და დროთა განმავლობაში, თუ მას არ გამოვიყენებთ, ნელ-ნელა განადგურდება. ამ მცირე ვარჯიშების კეთება თქვენს სხეულს ახსენებს, რომ უნდა იმუშაოს, რათა ფორმა შეინარჩუნოს და ზოგადი ფუნქცია გაიუმჯობესოს,“ – აღნიშნა ბეთსმა.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
