ჯანსაღი ცხოვრების პორტალი
კვირაში 150-წუთიანი აქტივობა – ის მინიმალური სტანდარტია, რომელიც საკუთარ ფიზიკურ და მენტალურ ჯანმრთელობაზე მზრუნველი ნებისმიერი ადამიანისთვის ცხოვრების განუყოფელი, ოქროს წესია. თუმცა ამ 150 წუთის განაწილებას კვირის დღეებზე ყველა ადამიანი ვერ ახერხებს.
გამოცემა newscientist.com წერს, რომ ასეთ შემთხვევაში კარგი გამოსავალია აღნიშნული წუთების განაწილება მხოლოდ უქმე დღეებზე, ზომიერი ან ინტენსიური ვარჯიშების ფორმით. სპეციალისტები ამბობენ, რომ ასეთ რეჟიმს ჯანმრთელობისთვის ისეთივე სარგებელი აქვს, როგორიც – კვირის განმავლობაში, ჯამში იგივე ხანგრძლივობით ვარჯიშს.
ეს კარგი ამბავია იმ ადამიანებისთვის, რომლებსაც ვარჯიშის დრო მხოლოდ კვირის ბოლოს აქვთ.
შეგახსენებთ, რომ ჯანმრთელობის მსოფლიო ორგანიზაცია მოზრდილ ადამიანებს აძლევს რეკომენდაციას, კვირის განმავლობაში ჯამში, 150-დან 300 წუთამდე ზომიერი დატვირთვით ივარჯიშონ. ჯანმოს რჩევაა, ამ ფიზიკურ აქტივობაში შევიდეს სწრაფი სიარული, მებაღეობა ან ველოსიპედით სეირნობა. მეორე ვარიანტია 75-დან 150 წუთამდე ინტენსიური აქტივობა, ისეთი როგორიცაა სირბილი და ცურვა.
იმის გასარკვევად, აქვს თუ არა მნიშვნელობა ფიზიკური აქტივობის დროს, ჩინეთის გუანჩოუს უნივერსიტეტის წარმომადგენელმა და მისმა კოლეგებმა გააანალიზეს 37-73 წლის ასაკის 93 ათასი ადამიანის მონაცემები. ამ ადამიანებს მაჯაზე დამაგრებული აქსელერომეტრების საშუალებით წლების განმავლობაში აკვირდებოდნენ.
დაკვირვების განმავლობაში 4 ათასი ადამიანი გარდაიცვალა. როგორც მკვლევრებმა აღმოაჩინეს, ადამიანებს შორის, რომლებიც კვირაში მინიმუმ 150 წუთის განმავლობაში ვარჯიშობდნენ (ჯამში), თუმცა ამ ხანგრძლივობის ვარჯიშებს ორ დღეში „ატევდნენ“, ყველა მიზეზით გარდაცვალების რისკი 32%-ით ნაკლები იყო მათთან შედარებით, ვინ ამ მოცულობის ფიზიკურ აქტივობას ვერ აღწევდნენ.
გულ-სისხლძარღვთა დაავადებების შედეგად გარდაცვალების რისკი კი 31%-ით ნაკლები იყო, ხოლო კიბოს მიზეზით გარდაცვალების ალბათობა 21%-ით იყო შემცირებული.
იმ ადამიანებში, რომლებიც იგივე ხანგრძლივობის აქტივობას მთელს კვირაზე ანაწილებდნენ, ყველა მიზეზით, გულ-სისხლ-ძარღვთა დაავადებებისა და კიბოს შედეგად გარდაცვალების რისკი შესაბამისად, 26%-ით, 24%-თ და 13%-ით შემცირებული იყო ნაკლებად აქტიურ ადამიანებთან შედარებით.
ამ მონაცემებმა, შესაძლოა, შექმნას შთაბეჭდილება, რომ ფიზიკური აქტივობა კვირის ბოლოს უკეთესია, ვიდრე კვირის დღეებში, თუმცა, კვლევის ავტორების განმარტებით, სტატისტიკურად მნიშვნელოვანი განსხვავება გარდაცვალების რისკის დონეებში ამ ნიშნით არ გამოკვეთილა.
„ეს კვლევა იმის დამატებითი განმარტებაა, რასაც აქტიურობის „სწორ“ ფორმად ვიცნობთ. ანუ არ არსებობს ერთადერთი „სწორი“ გზა,“ – ამბობს აი-მინ ლი ჰარვარდის უნივერსიტეტის სამედიცინო სკოლიდან.
„იმისგან დამოუკიდებლად, რეგულარულადაა ადამიანი აქტიური თუ კვირაში მხოლოდ ერთი-ორი დღით, ეს ერთნაირად სასარგებლოა,“ – ამბობს იგი.
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
