ჯანსაღი ცხოვრების პორტალი
ბევრ ადამიანს არ სურს უარი თქვას ფიზიკურ აქტივობასთან დაკავშირებულ ჩვევებზე, რომლებიც მათ ათწლეულების განმავლობაში ჩამოუყალიბდათ. თუმცა 50 წლის ასაკის შემდეგ ეს ჩვევები უკვე თქვენს წინააღმდეგ მუშაობს. ამის შესახებ სერტიფიცირებული ტრენერი ქრისტინ ჰისლოპი გამოცემა Eat This Not That-ში გამოქვეყნებულ სტატიაში წერს.
ის რამდენიმე რჩევას გვაძლევს, რომლებიც, მისივე თქმით, დაგვეხმარება, მოვახდინოთ სპორტის ამა თუ იმ სახეობის ადაპტაცია ორგანიზმის საჭიროებებთან. შედეგად, ჯანმრთელობას 50 წლის ასაკის შემდეგაც შევინარჩუნებთ.
გასათვალისწინებელია ისიც, რომ ამ ასაკის შემდეგ ჯანსაღი კვება კიდევ უფრო მნიშვნელოვანი ხდება. ექსპერტი გვირჩევს, განსაკუთრებული ყურადღება მივაქციოთ ცილებს, ხილსა და ბოსტნეულს, ასევე რთულ ნახშირწყლებს. ჰისლოპის კიდევ ერთი რეკომენდაციაა, თავი ავარიდოთ გადამუშავებულ საკვებს, შაქარსა და დამატკბილებლებს.
თუ დარბიხართ, ამ აქტივობას სხვა სახის ვარჯიშებიც უნდა დაამატოთ, რომლებიც სხვა კუნთებსაც მოძრაობაში მოიყვანს. მაგალითად, კარგი იქნება ცურვა და ველოსიპედით სეირნობა, შეგიძლიათ სატრენაჟორო დარბაზშიც იაროთ. აირჩიეთ ისეთი აქტივობა, რომელიც თქვენთვის მძიმე და რთული არაა.
შეგიძლიათ, იატაკზე დაჯდეთ ფეხებგადაჯვარედინებული და ადგეთ ისე, რომ ხელები მკერდზე გქონდეთ ჯვარედინად მიდებული? თუ არა, ეს იმას ნიშნავს, რომ თქვენს ერთფეროვან მოძრაობებს მცირედი მობილობა უნდა დაუმატოთ.
გაითვალისწინეთ, რომ სირბილის ჩანაცვლება უბრალო გასეირნებით ან მსუბუქი გარბენით შეიძლება. ეს აუმჯობესებს გულსისხლძარღვთა სისტემის ჯანმრთელობას, ძილს, ამცირებს გულის შეკუმშვებს მშვიდ მდგომარეობაში.
ჰისლოპის კიდევ ერთი რეკომენდაციაა, მხოლოდ ერთ მარშრუტზე და ერთ ტემპში არ ვირბინოთ. ის ამბობს, რომ ბევრ ხანდაზმულს უბრალოდ, ეშინია სწრაფად სირბილის, რადგან დაცემის საფრთხე რეალურია.
ჰისლოპი საკუთარ მაგალითზე დაყრდნობით გვიყვება, რომ ის დიდი ხნის განმავლობაში ვერ აკეთებდა ძალისმიერ ვარჯიშებს, რის შედეგადაც მარცხენა წვივის კუნთი დაკარგა. ამ ამბიდან 14 წელი გავიდა და მარცხენა კანჭი მარჯვენაზე პატარა აქვს. ესაა არგუმენტი იმისთვის, რომ კუნთებისთვის ძალისმიერი ვარჯიშები აუცილებელია.
ტრენერი გვაფრთხილებს, რომ 50 წლის ასაკის შემდეგ ვარჯიშის გრაფიკიც უნდა შევცვალოთ, რადგან ადამიანების უმრავლესობისთვის აღსადგენად კვირაში ერთი დღე არასაკმარისია. შესაძლოა, შესვენება ყოველ 3-4 დღეში დაგჭირდეთ. ეს თქვენი ვარჯიშების პროგრამაზეა დამოკიდებული.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
