ის, რომ ფიზიკური ვარჯიშები ჯანმრთელობისთვის სასარგებლოა, მეცნიერულად დადასტურებული ფაქტია. მეტიც – რეგულარული ვარჯიშები პირდაპირი გაგებით, სიცოცხლის წლებს გმატებთ.
Advertising
თუმცა ფიზიკური აქტივობა ამ კუთხით სათანადო ცნობიერებას მოითხოვს. მაგალითად, აქტივობის ზოგიერთ ფორმას ორგანიზმის გამოფიტვა შეუძლია, რის გამოც ხანდაზმულ ასაკში შესაძლოა პრობლემები გაჩნდეს. მაგალითად, ზოგიერთი ადამიანისთვის სირბილი მუხლებზე ზედმეტად დიდ დატვირთვას ქმნის, რაც საბოლოო ჯამში სახსრების ტკივილს იწვევს.
ფიზიოთერაპევტები გვიხსნიან, რა სახის ვარჯიშები ახდენს ყველაზე დადებით გავლენას სიცოცხლის ხანგრძლივობაზე. მათი თქმით, არსებობს ვარჯიშის ერთი სახეობა, რომელიც ადამიანის დღეგრძელობას უკავშირდება და რომელიც ყოველდღიურად უნდა ვაკეთოთ.
კერძოდ, ფიზიოთერაპევტ ლექს გონსალესის თქმით, ამ კუთხით სიარულზე უკეთესი მეთოდი არ არსებობს. პირველ რიგში, ის აუმჯობესებს გულის ჯანმრთელობასა და სისხლის მოძრაობას, მეორე – სიარული სახსრების ჯანმრთელობას ინარჩუნებს, უნარჩუნებს მათ მოქნილობას ისე, რომ ზედმეტ დატვირთვას არ უქმნის.
მესამე მიზეზი, რის გამოც სიარული მნიშვნელოვანია, ბალანსისა და კოორდინაციის შენარჩუნებაა. რაც მთავარია, სიარული ძალიან ხელმისაწვდომია – ამისთვის არაა საჭირო სპეციალური მოწყობილობები, თანაც ის უფასოა.
„სიარული იმდენად მნიშვნელოვანი ვარჯიშია ხანდაზმული ადამიანებისთვის, რომ ის სასიცოცხლოდ მნიშვნელოვან მე-6 მაჩვენებლად მიიჩნევა,“ – ამბობს გონსალესი და აღნიშნავს, რომ წინა 5 მაჩვენებელია არტერიული წნევა, გულისცემის რითმი, სუნთქვის სიხშირე, ტემპერატურა და ჟანგბადის მიწოდება.
არის ფიზიკური ვარჯიშის სხვა ფორმები, რომლებიც ჯანმრთელობას აუმჯობესებს. ფიზიოთერაპევტ კარენ ვესტერველტის თქმით, ეს ვარჯიშები ასევე უნდა ჩავრთოთ ჩვენს ყოველდღიურობაში, თუ ხანგრძლივი და ჯანმრთელი სიცოცხლე გვსურს.
„არსებობს ვარჯიშების 4 ზოგადი სახე: ძალისმიერი, აერობული ანუ კარდიოვარჯიშები, მოქნილობის ვარჯიშები და ნერვულ-კუნთოვანი ვარჯიშები – იგივე ბალანსის ვარჯიშები. ოთხივე ვარჯიში ყოველ კვირას უნდა ვაკეთოთ,“ – აცხადებს ფიზიოთერაპევტი.
მისივე თქმით, კვირის განმავლობაში არანაკლებ 150 წუთის განმავლობაში უნდა ვაკეთოთ ზომიერი ინტენსივობის აერობული ვარჯიშები და ორი დღე – ძალისმიერი ვარჯიში.
„ერთ-ერთი ფიზიოლოგიური ცვლილება, რომელიც ასაკთან ერთად ხდება, სარკოპენია, ანუ კუნთოვანი მასის დაკარგვაა. ეს პროცესი ჩქარდება, როცა ცხოვრების მჯდომარე წესი გაქვთ,“ – ამბობს ვესტერველტი და აღნიშნავს, რომ რეგულარული ძალისმიერი ვარჯიშები ამ პროცესს წინააღმდეგობას უწევს.
walking
ის გვირჩევს, ყოველი მსხვილი კუნთი კვირაში მინიმუმ ორჯერ გავჭიმოთ. ასევე ვივარჯიშოთ სტატიკური და დინამიური წონასწორობის უზრუნველყოფისთვის, რათა კარგი კოორდინაცია გვქონდეს. ეს განსაკუთრებით მნიშვნელოვანია ასაკთან ერთად, რათა დაცემა ავიცილოთ თავიდან.
გონსალესი კი ტაიჩისა და იოგას გვირჩევს – ფიზიკური დატვირთვის ორ სახეობას, რომლებიც მოქნილობასა და წონასწორობას აუმჯობესებს ისე, რომ ორგანიზმზე ჭარბი დატვირთვა არ ხდება.
ამასთან, არსებობს რამდენიმე ვარჯიში, რომლებთანაც ფრთხილად უნდა ვიყოთ, რადგან ისინი სხეულზე უდიდეს დატვირთვას ახდენს. კერძოდ, ესაა აქტიურობის ინტენსიური ფორმები, როგორიცაა სირბილი დიდ დისტანციაზე, სიმძიმეების აწევა და ვარჯიში მკვეთრი მოძრაობებით, ან ხერხემლის ძლიერი მოგრეხით. ფიზიოთერაპევტების თქმით, ამ ვარჯიშების სარგებლიანობის მიუხედავად, ისინი ტრავმების რისკს ზრდის და სწორედ ამის გამოა ისინი ხანშიშესული ადამიანებისთვის საფრთხის შემცველი.
ექიმი ვესტერველტი ხაზს უსვამს იმას, რომ იმის მიუხედავად, რომელ ვარჯიშს აირჩევთ, მთავარია, ისინი რეგულარულად აკეთოთ, რაც შესაძლოა, ისეთივე მარტივი იყოს, როგორც, უბრალოდ, ბოტასის ჩაცმა და სასეირნოდ გასვლა.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
მუცლის ცხიმი - დაუპატიჟებელი სტუმარი, რომელიც ჩვენთან შუახნის ასაკში მოდის და არასდროს სურს წასვლა. ამ თემაზე გამოცემა eatthis.com-ი ფიტნეს პროფესიონალს ესაუბრა, რომელიც გვიზიარებს მუცლის ცხიმის შემცირების საუკეთესო გზებს დაწოლის გარეშე.
ჯანსაღი ცხოვრების პორტალი
