არცთუ პოპულარული, თუმცა ეფექტიანი ვარჯიში მუხლებისა და მთელი სხეულის გასაძლიერებლად

როგორ გავაძლიეროთ სხეულის ქვედა ნაწილი და შევამციროთ მუხლების ტკივილი?
თემით ფიტნესის საკითხებზე მომუშავე ჟურალისტი ალისა პორტერი დაინტერესდა და  გამოცემა fitandwell.com-ისთვის ამ საკითხზე სტატია დაწერა.

ავტორი აღნიშნავს, რომ უკვე 5 წელზე მეტია სიმძიმეების აწევითაა დაკავებული და ფიქრობდა, რომ ყველა სახის ძალოვანი ვარჯიში სცადა.

თუმცა, როგორც თავად აღნიშნავს, საბედნიეროდ, ეს ასე არ აღმოჩნდა და მან აღმოაჩინა ახალი ვარჯიში, რომელმაც სხეულის ქვედა ნაწილის ვარჯიშისადმი მისი მიდგომა შეცვალა.
ამ ვარჯიშს ეწოდება „ხიდი მუხლქვეშა მყესისთვის“ და ის ალისას მუხლის ტრავმის მკურნალობისას, მისმა ფიზიოთერაპევტმა დაუნიშნა.

ალისა პორტერი მიიჩნევს, რომ ეს ყველაზე დაუფასებელი ვარჯიშია ფეხებისთვისა და მუხლის ტკივილის შესამცირებლად.

ფიზიოთერაპევტის განმარტებით, ესაა ძალიან მნიშვნელოვანი კუნთი, განსაკუთრებით თუ თქვენ მჯდომარე მდგომარეობაში დიდ დროს ატარებთ.

ამ ვარჯიშის საშუალებით შესაძლებელია სუსტი მუხლების გაძლიერება და სტაბილიზაცია. ის ასევე აძლიერებს დუნდულებს. პირველ რიგში, ასეთი ვარჯიში საუკეთესო არჩევანია მუხლქვეშა მყესებისთვის, რომლებიც ბარძაყის უკანა ზედაპირზე, მუხლსა და საჯდომს შორის მდებარეობს.
მუხლქვეშა მყესებს აქვს ორი ძირითადი ფუნქცია: ის ხელს უწყობს ფეხის უკან გადატანას, მაგალითად, სიარულისას, და მუხლის მოხრას.

როგორ უნდა ივარჯიშოთ:

დაწექით ზურგზე და ქუსლები რაიმე ამაღლებულ საყრდენზე დადეთ, მაგალითად სკამზე. მუხლები 90 გრადუსით მოხრილი უნდა იყოს.

ასწიეთ მარცხენა ფეხი და გააჩერეთ ჰაერში. დაძაბეთ სხეული და დააწექით მარჯვენა ქუსლზე, რათა თეძოები ასწიოთ, ვიდრე ტანი სწორ ხაზზე არ გასწორდება მუხლებიდან მხრებამდე. ამ დროს უნდა იგრძნოთ, როგორ მუშაობს მარჯვენა ფეხის უკანა ნაწილი.
დაეშვით ისე, რომ მოძრაობა აკონტროლოთ. ეს ვარჯიშები გაიმეორეთ 5-12-ჯერ თითოეულ მხარეს.

ვარჯიშის ვიდეო შეგიძლიათ იხილოთ youtube-ზე.

მუხლქვეშა მყესები, ალბათ, არაა სხეულის ის ნაწილი, რომლის გაძლიერებას დიდ დროს უთმობთ, თუმცა, სპეციალისტების თქმით, ნამდვილად ღირს, ამას ყურადღება მივაქციოთ, რადგან ადამიანების უმრავლესობას ფეხების უკანა ნაწილი სუსტი აქვს განსხვავებით ზედა ნაწილებისგან, რომელიც სხვადასხვა ყოველდღიური მოძრაობის გამო ძლერდება. ეს მოძრაობებია, მაგალითად, სკამიდან ან იატაკიდან ადგომა, კიბეზე ასვლა და ა.შ.

კვადრიცეფსებსა და მუხლქვეშა მყესების საუკეთესო ბალანსის მიღწევით შეძლებთ დამატებითი ძალის შეძენას და გაიუმჯობესებთ მუხლის ძალას, რაც ტრავმებისგან დაგიცავთ.
გაძლიერებული მუხლქვეშა ხიდები ააქტიურებს მთელს სხეულსა და დუნდულებს, ამცირებს შებოჭილობის გრძნობასა და ზურგის ტკივილს. ამ შედეგის მიღწევა შესაძლებელია რეგულარული ვარჯიშებით.

ასეთი ეფექტის გათვალისწინებით, სტატიის ავტორი ურჩევს მკითხველს, მიაქციონ ყურადღება სხეულის ამ ნაწილს. თავად მან ეს ვარჯიში საკუთარი ფიზიკური აქტივობის პროგრამაში წარმატებით ჩართო.

* * *

სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”