ჯანსაღი ცხოვრების პორტალი
ფიტნესის ექსპერტები ფიზიკურ ვარჯიშს პლანკს კუნთების გაძლიერების ერთ-ერთ საუკეთესო საშუალებად მიიჩნევენ. მათი თქმით, ეს ვარჯიში ეფექტიანია ასაკისა და ფიზიკური მომზადების დონის მიუხედავად.
არსებობს პლანკის მრავალი ვერსია, თუმცა მისი ძირითადი ფორმა გულისხმობს ფეხის თითებსა და წინა მხრებზე გაჩერებასა და სხეულის იატაკის პარალელურად შენარჩუნებას.
პლანკი შესაძლოა რთულად შესასრულებელი მოგეჩვენოთ, განსაკუთრებით იმ შემთხვევაში, თუ თქვენ ფიტნესის ფანატიკოსი არ ხართ, თუმცა შესაძლებელია მისი შეცვლა ისე, რომ მისი გაკეთება უფრო მარტივი იყოს, და პირიქით – შეგიძლიათ მისი კიდევ უფრო გართულება.
არავინ ზუსტად არ იცის, ვინ გამოიგონა პლანკი, თუმცა ბევრი ამ გამოგონებას ჯოზეფ პილატესს მიაწერს, რომელმაც პილატესის ვარჯიშების სისტემა 1900-იან წლებში შექმნა.
დაახლოებით 10 წლის წინ პლანკი ძალიან პოპულარული ვარჯიში გახდა. მისი უპირატესობა ისაა, რომ თეძოებზე და ხერხემალზე დაწოლისგან დაზღვეულები ვართ.
ამ ვარჯიშს სხვა უპირატესობებიც აქვს – ის თქვენი სხეულის უამრავ კუნთს ამაგრებს. ამერიკელი ფიზიოთერაპევტის კლერ მოროუს განცხადებით, პლანკს შეუძლია ჩვენი მხრების, კისრის, იდაყვების, თეძოების და სხვა კუნთების გააქტიურება.
ფიტნეს-პროგრამების სპეციალისტის ჯული ლოგის თქმით, პლანკი შესანიშნავი გზაა ტანადობის გაუმჯობესებისთვის და ის დაგვეხმარება, უკეთ შევასრულოთ ყოველდღიური საქმეები.
მისი თქმით, ეს ვარჯიში მოსახერხებელია და მისი გაკეთება ნებისმიერ დროს, ნებისმიერ ადგილას შეიძლება.
გარდა ამისა, 2021 წელს ჟურნალ Healthcare-ში გამოქვეყნებული სტატიის თანახმად, ეს ვარჯიში ადამიანებს შარდის შეუკავებლობის პრობლემის დაძლევაშიც ეხმარება.
მოროუს თმით, მათ, ვინც ახლა იწყებს ამ ვარჯიშის შესრულებას, შეუძლიათ უფრო მარტივი პოზიციით დაიწყონ, მაგალითად, „ჩიტი-ძაღლით“: დადექით „ოთხზე,“ შემდეგ მარჯვენა ხელი გაჭიმეთ, მარცხენა ფეხი კი უკან გასწიეთ. შემდეგ გაიმეორეთ მარცხენა ხელით და მარჯვენა ფეხით. ეს დაგეხმარებათ ვარჯიშისთვის მომზადებაში.
„ფიცრის“ ვარჯიშისას თქვენი მხრები და ბარძაყები ჩამოშვებული არ უნდა იყოს, საჯდომი კი ზემოთ არ უნდა იყოს აწეული.
ასევე ყურადღება უნდა მიაქციოთ სუნთქვას, რადგან ბევრი ადამიანი აღნიშნულ პოზიციაში ყოფნის დროს სუნთქვას იკავებს, რაც შეიძლება საშიში იყოს.
ასევე შეგიძლიათ სცადოთ „ფიცრის“ სხვადასხვა ვარიაცია. მაგალითად, ბანალსირება ცალ მხარეს, შეერთებული ფეხებით და გვერდზე გადაწეული სხეულით. ეს ვარიანტი თეძოებს აძლიერებს და კარგ ბალანსს უზრუნველყოფს.
„ფიცრის“ გაკეთება უნდა დაიწყოთ წინა მხრებით, ფეხის თითები იატაკზე უდნა დადოთ, შემდეგ კი სხეული უნდა აზიდოთ.
მთავარი დასკვნაა, რომ „ფიცრის“ კეთება ნელა და მსუბუქად დაიწყოთ.
* * *
უნდა გაითვალისწინოთ, რომ ქრონიკული დაავადებების ან ჯანმრთელობის სხვა პრობლემების შემთხვევაში, უმჯობესია, კონსულტაციები ექიმთან გაიაროს, რათა ფიზიკური დატვირთვა თქვენი ჯანმრთელობის მდგომარეობის შესაბამისი იყოს.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
