ჯანსაღი ცხოვრების პორტალი
ქვეყანაში ვირუსების გავრცელების პიკია. მართალია, სეზონური ინფექციების დამარცხებაში მთავარი როლი აცრას, მედიკამენტებსა და სითხის მიღებას აქვს, თუმცა ბევრი ადამიანი უგულვებელყოფს ამ მიმართულებით ფიზიკური აქტივობის მნიშვნელობას. კერძოდ, როგორც სპეციალისტები გვეუბნებიან, ორგანიზმის იმუნური სისტემის გაძლიერებისთვის ფიზიკურ აქტივობას უდიდესი როლის შესრულება შეუძლია.
იმუნოლოგ-ალერგოლოგ ბიძინა კულუმბეგოვის განცხადებით, მთავარი და მნიშვნელოვანი კვებაა. მისი თქმით, უპირველესი პრიორიტეტი ბალანსირებული და ჯანსაღი საკვების მიღებაა. „ჩვენ და არა მხოლოდ ჩვენ – მთელ მსოფლიოს აქვს ასეთი სენი – როცა შეგვექმნება ჯანმრთელობის პრობლემა, მხოლოდ ამ დროს გვახსენდება ჯანსაღი კვება. ჯანსაღ საკვებში ვგულისხმობ ბოსტნეულს, ხილს, ასევე ცილოვან საკვებს. ასევე საჭიროა ნაჯერი ცხიმების ამოღება – შემწვარის, მოხრაკულის… მეორე ესაა ფიზიკური აქტივობა, რაც იმუნიტეტს ყველაზე მეტად „ავარჯიშებს“. შესაძლოა პარადოქსულად ჟღერდეს, მაგრამ ფიზიკური აქტივობა ასევე არის ტვინის მთავარი მკვებავი. იაპონიასა და სხვა ქვეყნებში ის, რასაც სთავაზობენ მოსახლეობას, რომ ალცჰაიმერი არ განვითარდეს, სწორედ ფიზიკური აქტივობაა, რომელიც ასტიმულირებს თავის ტვინს,“ – ამბობს კულუმბეგოვი.
მისი თქმით, ფიზიკური აქტივობის იდეალური ხანგრძლივობა კვირაში საშუალოდ 150 წუთია, რაც შეიძლება გაკეთდეს მარტივი აქტივობის, თუნდაც ფეხით სიარულით. იმუნიტეტის გასაძლიერებლად კიდევ ერთ მნიშვნელოვან ფაქტორად იმუნოლოგი ძილის მოწესრიგებას ასახელებს.
ვირუსების სეზონისთვის მომზადების აუცილებელ კომპონენტად კულუმბეგოვი ასევე ასახელებს გრიპის ვაქცინაციას, განსაკუთრებით ქრონიკული დაავადებების მქონე მოქალაქეებისა და ორსულებისთვის.
***
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
