ჯანსაღი ცხოვრების პორტალი
ჩვენ ვიცით, რომ დიდი ხნის განმავლობაში ჯდომა კარგი არ არის, მაგრამ საინტერესოა, რამდენად ბევრი ვარჯიშია საჭირო, რომ გაანეიტრალოს ის ნეგატიური შედეგები, რაც მთელი დღის განმავლობაში მაგიდასთან მუდმივ ჯდომას მოაქვს.
გამოცემა Sciencealert წერს, რომ კვლევების თანახმად, ამ მიზნის მისაღწევად 30-40-წუთიანი ვარჯიშიც საკმარისია.
კვლევა აჩვენებს, რომ ყოველდღიურად, ნახევარსაათიანი ზომიერი და ძლიერი ინტენსივობის ფიზიკური აქტივობა აბალანსებს 10 საათის განმავლობაში უძრავად ჯდომის ნეგატიურ ეფექტს, თუმცა ნებისმიერი ვარჯიში ან თუნდაც უბრალოდ ფეხზე დგომაც კი გარკვეულწილად გვეხმარება.
ეს დასკვნები ეფუძნება 2020 წელს გამოქვეყნებული მეტაანალიზის კვლევას, რომელიც აფასებს წინა ცხრა კვლევას ჯამში 44,370 ადამიანის მონაწილეობით –
ეს ადამიანები ოთხ სხვადასხვა ქვეყანაში ცხოვრობდნენ. მონაცემების ანალიზმა აჩვენა, რომ რაც უფრო მცირდება საშუალო ან ინტენსიური ფიზიკური აქტივობის ხანგრძლივობა, მით მეტად იზრდებოდა სიკვდილის რისკი.
აღნიშნული კვლევა ჯამში შეესაბამება ჯანმოს რეკომენდაციებს, რომელთა თანახმადაც, ადამიანები კვირის განმავლობაში 150-300 წუთის განმავლობაში უნდა იყვნენ დაკავებული საშუალო ინტენსივობის ვარჯიშით, ან 75-150-წუთის მაღალინტენსიური აქტივობით.
კიბეზე ასვლა ლიფტით სარგებლობის ნაცვლად, ბავშვებთან ან შინაურ ცხოველებთან თამაში, იოგა და ცეკვები, სახლის საქმეების კეთება, სეირნობა ან ველოსიპედით სიარული – ეს ყველაფერი განიხილება, როგორც მეთოდები, რომელთა დახმარებით ადამიანებს შეუძლიათ, უფრო აქტიურები იყვნენ. ამიტომ, თუ დღეში ერთიანად 30-40 წუთის გამოყოფა არ შეგიძლიათ, დაიწყეთ მცირედით.
მართალია, რთულია საერთო რეკომენდაციების მიცემა ყველა ასაკისა და აღნაგობის ადამიანისთვის, მაგრამ აქტივობის 40-წუთიანი მონაკვეთი შეესაბამება წინა კვლევების დასკვნებს.
ამ შედეგების მიუხედავად, საკვლევი კიდევ ბევრი რამ არის – მათ შორის ის, სადაა ზღვარი, საიდანაც შეგვიძლია ვისაუბროთ ზედმეტად ხანგრძლივ ჯდომაზე. ამიტომ ამ კუთხით კვლევები გრძელდება.
* * *
სტატიაზე ყველა საავტორო უფლება დაცულია. მისი სრულად ან ნაწილობრივ გამოქვეყნების შემთხვევაში მის დასაწყისში მიუთითეთ – ” წყარო: www.goodlife.ge ”
